Juristi Valdet Hoxha ka vlerësuar se nisma e Partisë Demokratike të Kosovës për plotësim ndryshimin e Ligjit për Dhomat e Specializuara mund të bëhet.
Ai ka thënë se Kosova ka dëshmuar që është për drejtësi dhe se Gjykatën Speciale e ka formuar me vullnetin e saj pas kërkesës së bashkësisë ndërkombëtare.
Hoxha në emisionin “Mesditë” në Tëvë1, ka thënë se ndryshimi i ligjit mund të bëhet duke qëndruar brenda kornizave kushtetuese e ligjore.
“Kjo gjykatë pothuajse edhe ka krijuar një lloj praktike si të pavarur nga struktura ligjore dhe kushtetuese nga themelimi i saj. Vlerësoj se nuk ka asgjë të keqe pas një analize të mirëfilltë të bërë, të ndryshohet ai ligji, gjithmonë duke qëndruar brenda kornizave kushtetuese ligjore. Pra në njërën anë nuk zhbëhet Gjykata Speciale, sepse Kosova është e interesuar për drejtësi, por jo një drejtësi, jashtë standardeve ndërkombëtare, ku për të provuar një fakt apo një provë kjo gjykatë ka një standard të ulët ndoshta si në një vend afrikan”, ka thënë Hoxha.
Partia Demokratike e Kosovës ka dorëzuar sot në Kuvendin e Republikës së Kosovës, Projektligjin për ndryshimin dhe plotësimin e Ligjit nr. 05/L-053 për Dhomat e Specializuara dhe Zyrën e Prokurorit të Specializuar.
Kryetari i PDK-së, Bedri Hamza tha se përmes kësaj nisme PDK kërkon që Kuvendi i Republikës së Kosovës ta ushtrojë përgjegjësinë e tij kushtetuese dhe ligjvënëse, duke shqyrtuar me seriozitet dispozitat ligjore që rregullojnë funksionimin e Dhomave të Specializuara.
PDK procedon në Kuvend ndryshimin e ligjit për Dhomat e Specializuara
