Ish-kryeministri i Kosovës, Avdullah Hoti, ka thënë se Qeveria ka pranuar që çështja e dinarit të diskutohet me Serbinë në Bruksel në kuadër të dialogut.
Hoti tha se gjatë këtyre dy javëve, aleatët kanë kërkuar me ngulm koordinim në Prishtinë vetëm për evitim të siç tha ai, pasojave për qytetarët e Kosovës të komunitetit serb. Por që sipas tij, Qeveria nuk deshi të arrijë këtë dakordim me aleatët, por pranojnë ta diskutojnë në kuadër të dialogut në Bruksel.
“Para dy jave, Kosova u kritikua në Këshillin e Sigurimit për vendime të pakoordinuara. Kritikat nuk ishin vetëm nga Kina e Rusia, por nga aleatët që Kosovës ia sigurojnë kufijtë. Gjatë këtyre dy javëve, aleatët kanë kërkuar me ngulm koordinim në Prishtinë vetëm për evitim të pasojave për qytetarët e Kosovës të komunitetit serb. Asgjë tjetër nuk kanë kërkuar. Qeveritarët e ndritur të Kosovës nuk deshën të arrijnë dakordim në Prishtinë me aleatët. Por pranojnë që këtë çështje ta diskutojë me Serbinë në Bruksel në kuadër të dialogut”, tha Hoti.
E ky veprim i Qeverisë sipas Hotit “nuk do koment”, derisa ish-kryeministri ironizoi duke thënë “Mund t’i thuash jo dialogut në Bruksel për dinarin, por pastaj nuk mundesh”
“Kjo nuk do koment. Këto janë pasojat kur vendimmarrja shtetërore i nënshtrohet interesit elektoral. “Mund t’i thuash jo dialogut në Bruksel për dinarin, por pastaj nuk mundesh”, tha tutje Hoti.
Ndryshe, Bashkimi Evropian ka konfirmuar pjesëmarrjen e delegacioneve të Kosovës dhe Serbisë në një takim në Bruksel më 27 shkurt për çështjen e ndalimit të dinarit në Kosovë./teve1.info./
