Kreu i Hezbollahut, Naim Qassem hodhi poshtë bisedimet e qeverisë libaneze me Izraelin dhe përshkroi pesë kushte që duhet të përmbushen përpara se të mund të zhvillohen bisedime të drejtpërdrejta.
“Ndalimi i agresionit në tokë, det dhe ajër, tërheqja e Izraelit nga territoret e pushtuara, lirimi i të burgosurve, kthimi i njerëzve në të gjitha fshatrat dhe qytetet e tyre dhe rindërtimi”, tha ai, citon Al Jazeera.
Ai i bëri thirrje qeverisë libaneze që të ndjekë një dialog të brendshëm, dhe të vendosë interesat e Libanit para diktateve izraelite dhe të huaja.
Kreu i grupit libanez refuzoi poashtu mundësinë e çarmatosjes dhe tha se nuk do të tërhiqen as përkulen.
“Ne po vazhdojmë rezistencën tonë mbrojtëse për Libanin dhe popullin e tij, nuk do të kthehemi në [status quo-në] para marsit, do t’i përgjigjemi agresionit izraelit dhe do ta përballojmë atë. Pavarësisht se çfarë kërcënon armiku, ne nuk do të tërhiqemi, nuk do të përkulemi, nuk do të mposhtemi”, tha ai.
Qassem shtoi se potenciali i tyre është “i pashtershëm” dhe u zotua se Izraeli nuk do të qëndrojë në Liban dhe se “populli ynë do të kthehet në tokat e tij deri në centimetër e fundit të kufirit tonë jugor me Palestinën e pushtuar”.
Kreu i Hezbollahut tha se Izraeli, me mbështetjen e SHBA-së, vuri bast për shkatërrimin e grupit, por kjo nuk ka pasur sukses që nga 23 shtatori 2024, kur Izraeli filloi një fushatë sulmesh ajrore në të gjithë Libanin.
