Kandidati i Lidhjes Demokratike të Kosovës për deputet, Gëzim Hazrolli, ka deklaruar se programi qeverisës i LDK-së është i fokusuar në forcimin e institucioneve të sigurisë dhe krijimin e një ambienti më të favorshëm për investime dhe perspektivë për të rinjtë.
Hazrolli tha se LDK synon të ruajë dhe të rrisë kapacitetet e të gjitha institucioneve të sigurisë në vend, duke përfshirë Forca e Sigurisë së Kosovës, Policia e Kosovës, Agjencia e Kosovës për Inteligjencë dhe institucionet e tjera.
“Planprogrami qeverisës i LDK-së është i fokusuar në mbajtjen dhe ngritjen e kapaciteteve të të gjitha institucioneve të sigurisë duke filluar prej FSK-së, Policisë së Kosovës, AKI-së dhe institucioneve tjera të nevojshme. Ne duhet të tentojmë ta kthejmë çdo pjesë të Republikës së Kosovës në një jetë normale dhe njëjtë duhet të veprojmë me veriun. Nuk duhet ta përdorim për asnjë qëllim politik e elektoral, sepse ne jemi në bashkëpunim me partnerët tanë për ta ruajtur stabilitetin, sigurinë dhe mirëqenien e qytetarëve”, deklaroi ai.
Duke komentuar edhe zhvillimet në fushatën zgjedhore, Hazrolli u shpreh se ka vërejtur një qasje më të rezervuar nga Lëvizja Vetëvendosje krahasuar me fushatat e kaluara.
“LVV nuk e ka atë sjelljen që e ka pasur në fushata tjera, nuk e di pse. Janë të heshtur dhe merren me disa tematika që synojnë të tërheqin vëmendjen e elektoratit me projekte. Ne duhet ta bëjmë vendin tonë atraktiv për investime, duhet të bëjmë më të mirën, thjesht për ta kthyer shpresën e kësaj rinie në Republikën e Kosovës”, tha Hazrolli.
Sipas tij, forcimi i sigurisë, zhvillimi ekonomik dhe krijimi i mundësive të reja për të rinjtë mbeten ndër prioritetet kryesore për të ardhmen e Kosovës./teve1.info/
