Kryetarja e Kuvendit të Kosovës dhe ushtruesja e detyrës së presidentes, Albulena Haxhiu, i ka kërkuar Grupit Parlamentar të PDK-së të tërhiqet nga propozimi procedural që Projektligji për ndryshimin e Ligjit për Dhomat e Specializuara të miratohet në lexim të dytë.
Haxhiu tha se nuk është në rregull që të ndërhyhet në rendin e ditës ndërmjet pikave të seancës, duke theksuar se për këtë çështje ishte arritur një dakordim paraprak mes drejtuesve të Lëvizjes Vetëvendosje dhe PDK-së.
Ajo u bëri thirrje liderëve politikë që të takohen dhe të arrijnë marrëveshje për zgjedhjen e presidentit të Kosovës, duke e cilësuar këtë si një çështje me rëndësi për funksionimin institucional të vendit.
Sipas saj, Kuvendi mund të hartojë dhe miratojë ligje, por nëse vendi shkon sërish në zgjedhje për shkak të moszgjedhjes së presidentit, situata institucionale do të vështirësohej më tej.
“Nuk është në rregull që të ndërhyni midis pikave të rendit të ditës. Ne e kuptojmë ndjeshmërinë dhe rëndësinë e çështjes. Dakordimi ishte që pas takimit të kryetarëve, përkatësisht të LVV-së dhe kryetarit të PDK-së, mund të vijmë me një dakordim për çështjen në fjalë. Kështu ishte marrëveshja dhe nuk e kuptoj që, pa kaluar pak kohë, vini dhe e ndryshoni qëndrimin. Unë ju inkurajoj që, për shkak pikërisht të urgjencës që kemi, sensitivitetit dhe rëndësisë pas vendimit të 16 shtatorit, është shumë e rëndësishme që të jemi bashkë dhe t’i japim vendit president, sepse ne mund të hartojmë ligjin. Por ata atje, nëse ne shkojmë të zgjedhim, mbesin vetëm. Prandaj, unë sot ju ftoj, edhe si kryetare e Kuvendit, edhe si ushtruese e detyrës së presidentes, takohuni, merruni vesh dhe ejani në seancë. Nuk ka më të rëndësishme, po e përsëris, se presidenti, jo për shkak të emrit të përveçëm, por nuk mund ta çojmë vendin në zgjedhje për herë të dytë për shkak të presidentit. Është papërgjegjësi, është moskokëçarje në raport me përgjegjësitë që i kemi para qytetarëve të Republikës së Kosovës. Pra, ju lutem që të veproni në përputhje me përgjegjësinë”, tha ajo.
Haxhiut i replikoi shefi i Grupit Parlamentar të PDK-së, Arian Tahiri, i cili tha se Kuvendi është rrethuar me qytetarë dhe nuk duhet të veprohet sikurse nuk po ndodh asgjë.
“Në këtë moment, qyteti i Prishtinës dhe Kuvendi i Kosovës është i rrethuar me shqiptarë të Kosovës që kanë ndjeshmëri për këtë çështje. Ne nuk duhet të sillemi dhe veprojmë sikurse nuk është duke ndodhur asgjë. Po kërkojmë që të votohet në lexim të dytë dhe bëhet fuqiplotë”, tha ai.
Pavarësisht kësaj, mocionin e PDK-së kryetarja e Kuvendit nuk e hodhi fare në votim, por vazhdoi me pika të tjera të rendit të ditës.
