Ushtruesja e detyrës së Presidentes së Kosovës, Albulena Haxhiu, ka kërkuar nga organet e drejtësisë që të zhvillojnë hetime të plota dhe të shpejta për vrasjet e fundit të grave në vend, si dhe që autorët të marrin dënimin më të ashpër të paraparë me ligj.
Përmes një postimi në Facebook, Haxhiu ka reaguar pas vrasjes së një gruaje 80-vjeçare në Prizren, ku i dyshuari është bashkëshorti i saj 81-vjeçar.
Ky rast ka ndodhur vetëm dy ditë pas vrasjes së një gruaje shtatzënë në Malishevë, ku po ashtu i dyshuari është bashkëshorti i viktimës.
“Më tronditi lajmi për vrasjen e një gruaje 80-vjeçare në Prizren. Vetëm dy ditë më parë, një tjetër grua u vra, ndaj këto nuk mund të trajtohen si raste të izoluara. Mjaft më me vrasjen dhe dhunën ndaj grave! Jeta dhe dinjiteti i çdo gruaje duhet të mbrohen me çdo mjet”, ka shkruar Haxhiu.
Ajo ka bërë thirrje për forcimin e masave institucionale kundër dhunës ndaj grave, duke theksuar se çdo rast duhet të hetohet deri në zbardhjen e plotë të rrethanave.
“Kërkoj nga organet e drejtësisë hetim të plotë dhe të shpejtë dhe që autorët, të marrin dënimin më të ashpër të paraparë me ligj. Çdo rast duhet të zbardhet deri në fund, por po aq e rëndësishme është që dhuna të njihet dhe të ndalet para se të përfundojë në vrasje”, ka shtuar ajo.
Sipas saj, është po aq e rëndësishme që rastet e dhunës të identifikohen dhe të trajtohen në kohë, për të parandaluar që ato të përshkallëzohen deri në vrasje.
“Institucionet përgjegjëse duhet të ndërmarrin masa urgjente dhe konkrete për parandalimin e dhunës ndaj grave dhe mbrojtjen e tyre”, ka përfunduar ajo./teve1.info/
