Ministrja e Drejtësisë, Albulena Haxhiu ka thënë se që nga 2020 deri në 2022 janë shpenzuar 16 milionë euro për mbrojtjen e ish-krerëve të UÇK-së në Hagë.
Haxhiu tha se e mbështetja financiare për ekipet mbrojtëse të personave në Hagë si dhe lehtësimi i vizitave të familjarëve është e vetmja punë që aktualisht Ministrja e Drejtësisë është përgjegjëse.
“E vetmja punë që aktualisht është përgjegjëse ministria e drejtësisë është mbështetja financiare për ekipet mbrojtëse të personave që janë në Hagë sikurse edhe lehtësimi i vizitave të familjarëve të personave që janë në Hagë. Asnjëherë më mirë nuk është kryer kjo punë sesa tani”, ka deklaruar ajo në emisionin “Këndi i Debatit” në Tëvë1.
Sipas saj, mbështetja financiare për ekipet mbrojtëse të personave në Hagë është mandat ligjor.
“Nga 2020 deri në 2022 deri tani janë shpenzuar 16 milionë euro për ekipet mbrojtëse të personave që janë në Hagë. Këtë e kemi mandat ligjor. Qëllimi i publikimit të shpenzimeve ka qenë që ne jemi krejt në rregull me këto dhe është gjithçka e ligjshme sepse po bëhet fjalë për taksat e qytetarëve”, përfundoi Haxhiu. /Teve1.info/
