“Sofra e zbrazur qe 26 vite”
Kështu shkruan në pankartën që po e mbajnë në duar.
E të tjera si kjo, u panë gjatë së dielës me rastin e Ditës Ndërkombëtare të Personave të Zhdukur me dhunë.
Familjarët erdhën për homazhe te Memoriali i Personave të Zhdukur.
E përveç tyre, për homazhe erdhën edhe ushtruesja e detyrës së presidentes, Albulena Haxhiu dhe kryeministri në detyrë, Albin Kurti.
Shefja e shtetit në detyrë tha se për mbi 1500 personat e zhdukur kërkimet po vazhdojnë.
“Janë edhe mbi 1,500 persona të zhdukur me dhunë gjatë luftës, të cilët ende nuk janë gjetur. Për familjet pritja vazhdon, ndërsa për Republikën e Kosovës ende vazhdon të jetë një kapitull i hapur i cili nuk do të mbyllët deri sa të gjendet edhe personi i fundit. Kërkimet nuk janë ndalur dhe janë gjetur mbetje mortore. Vetëm në muajin e fundit në Kalludër dhe Jabukë të Zubin Potokut janë gjetur mbetje mortore të së paku 23 personave”, tha Haxhiu.
Ndërsa kryeministri në detyrë, Kurti rikujtoi zotimin e Serbisë për bashkëpunim në hapjen e arkivave.
“Mos harrojmë edhe deklaratën e 2 majit të vitit 2023, me të cilën Serbia zotohet që do të bashkëpunojë për hapjen e arkivave në mënyrë që të zbardhet e vërteta. Më duhet ta ritheksoj që një ndër dosjet më të rëndësishme që të deklasifikohet është ajo e brigadës së motorizuar ushtarake të Ushtrisë Jugosllave 37, e cila ka kryer shumë masakra në Kosovë e posaçërisht në Drenicë”, u shpreh Kurti.
Ai tha se Kosova nuk mund të presë deri në vitin 2044 për hapjen e tyre.
“Nuk mund të presim deri në vitin 2044 që të hapen këto arkiva. Ato do të duhej që të hapeshin që dje, që pardje. Ndërkohë që janë klasifikuar pikërisht në vitin 2014, atëherë kur presidenti aktual i Serbisë, Vuçiç, ishte ministër i Mbrojtjes dhe ishte gjithashtu dhe koordinatori i shërbimeve sekrete informative. Tash merreni me mend, ky që është presidenti i Serbisë sot, në vitin 2014 kur janë klasifikuar dosjet e Ushtrisë Jugosllave që kanë kryer krime në Kosovë, e në veçanti e brigadës së motorizuar 37, ka qenë ministri i Mbrojtjes dhe koordinatori i shërbimeve informative dhe sekrete të Serbisë”, tha Kurti
Për homazhe te ky memorial ishin edhe përfaqësues nga Ambasada Amerikane.
