Sipas Haskukës, në kohën kur Vrenezi është dënuar për keqpërdorim detyre, ligji për legalizime nuk ka qenë ende në fuqi.
Ai thotë se kjo po u tregon zyrtarëve shtetërorë që nuk duhet të veprojnë kur kanë punë me njerëz që kanë influencë nëpër institucione.
“Do të thotë nuk ka pasur ligj për legalizime për periudhën që po flitet. Edhe në një farë aspekti, gjykata po i referohet një ligji i cili në atë kohë nuk ka qenë në fuqi. Kjo është një absurditet tjetër..kjo me një farë aspekti po u tregon të gjithë zyrtarëve shtetërorë që kur kanë të bëjnë me njerëz të fuqishëm, me për shembull oligarkë, me njerëz ku kanë influencë nëpër institucione atëherë nuk duhet të veprojnë. Ata mund të veprojnë vetëm ndaj të varfërve, atyre të pafuqishëm por jo edhe ndaj atyre të fuqishëm të cilët e shkelin ligjin. Kjo është do të thotë një vendim politik”, tha ai në “Ditari” në Tëvë 1.
Haskuka theksoi se deputetja Vrenezi nuk duhet të japë dorëheqja nga kjo pozitë, pasi sipas tij, kjo do të thotë përulje ndaj “më të fortëve”.
Ai shtoi se vendimi ende nuk është marrë në formë të shkruar.
Gjykata Themelore në Prizren, të martën, ka shpallur aktgjykim dënues ndaj të akuzuarve Islam Thaqi dhe Jetmire Vrenezi për keqpërdorim të detyrës zyrtare, të njëjtit i ka dënuar me nga 3 vite burg dhe dy mijë euro gjobë.
Në aktakuzë thuhet se me 19 dhe 21 korrik 2019 në Prizren, në objektin “Abi Çarshia”, të akuzuarit Islam Thaqi, në cilësinë e drejtorit të Inspektoratit, Jetmire Verezi dhe Egzona Morina Thaqi, inspektore të ndërtimit, Arianit Taraku dhe Isë Bislimaj, zyrtarë në Drejtorinë e Inspektoratit, Shqipëron Krasniqi, përfaqësues ligjor në Komunën e Prizrenit, duke shfrytëzuar detyrën apo autoritetin zyrtar, i tejkalojnë kompetencat e tyre me qëllim të shkaktimit të dëmit “Abi” SH.P.K në Prizren.
Sipas aktakuzës, të akuzuarit realizojnë rrënimin e aneks-objektit të “Abi Çarshia”, duke e ditur se i dëmtuari ka dorëzuar aplikacionin për legalizim. /Teve1.info/
