Ambasadori i Mbretërisë së Bashkuar në Kosovë, Jonathan Hargreaves, ka deklaruar se dënimet e fundit të shqiptuara nga Dhomat e Specializuara të Kosovës ndaj ish-krerëve të UÇK-së kanë të bëjnë me përgjegjësinë për krime individuale dhe nuk përbëjnë gjykim ndaj shtetësisë, sovranitetit apo të drejtës së Kosovës për të përcaktuar të ardhmen e saj.
Ai ka theksuar se Mbretëria e Bashkuar do të vazhdojë ta mbështesë fuqishëm të drejtën e Kosovës për të përcaktuar të ardhmen e saj, ndërsa ka rikujtuar se personat e dënuar kanë të drejtë të apelojnë vendimet.
“Dënimet e fundit kanë të bëjnë me krime individuale të kryera ndaj viktimave nga komunitete të ndryshme. Ato në asnjë mënyrë nuk përbëjnë gjykim mbi shtetësinë, sovranitetin apo të drejtën e Kosovës për të përcaktuar të ardhmen e saj, të cilën Mbretëria e Bashkuar do të vazhdojë ta mbrojë fuqishëm. Personat e dënuar kanë të drejtë të apelojnë aktgjykimet e tyre”, ka deklaruar Hargreaves.
Sipas ambasadorit, Mbretëria e Bashkuar mbetet e përkushtuar ndaj drejtësisë ndërkombëtare, llogaridhënies dhe respektimit të vendimeve të gjykatave ndërkombëtare.
Hargreaves ka përmendur edhe rolin e Mbretërisë së Bashkuar në Kosovë gjatë vitit 1999, duke kujtuar se trupat britanike hynë në Kosovë përmes Hanit të Elezit si pjesë e misionit të NATO-s, të autorizuar nga Rezoluta 1244 e Këshillit të Sigurimit të OKB-së.
Ai ka thënë se ndërhyrja e NATO-s erdhi pas asaj që e ka përshkruar si “politika katastrofike” të regjimit të Slobodan Millosheviqit, të cilat, sipas tij, çuan në krime lufte dhe represion në Kosovë.
Ambasadori britanik ka theksuar se qindra mijëra shqiptarë të Kosovës u detyruan të largoheshin nga vendi ose u zhvendosën brenda Kosovës, ndërsa Këshilli i Sigurimit i OKB-së kishte shprehur vazhdimisht shqetësimin për gjendjen humanitare.
Hargreaves ka thënë gjithashtu se Mbretëria e Bashkuar është krenare për rolin e saj në Kosovë në vitin 1999 dhe në vitet pasuese.
Ai ka vlerësuar vendimin e Kosovës për të themeluar dhe mbështetur Dhomat e Specializuara, duke thënë se kjo dëshmon gatishmërinë për të mbështetur parimin se askush nuk është mbi ligjin.
Në fund, ambasadori ka theksuar se Mbretëria e Bashkuar do të vazhdojë të punojë me partnerët në rajon dhe në nivel ndërkombëtar për paqe, drejtësi, pajtim dhe një të ardhme të begatë për të gjitha komunitetet./teve1.info/
