Kulla e Haradinajve edhe këtë të martë hapi dyert për mysafirët.
Mirëseardhje atyre u uroi i zoti i kullës.
Krejt kjo, në ditën kur Beteja e Gllogjanit, i mbushi plot 28 vjet.
Në krye të odës, bashkë me uniformën e UÇK-së, u vendosen ata që dhanë jetën për lirinë e vendit.
Ishte kjo atmosfera që të martën mbizotëroi në kullën e Haradinajve në Gllogjan, me rastin e Epopesë së Dukagjinit.
Ndërsa jashtë, qytetarë të shumtë, po bënin homazhe në kompleksin memorial “Dëshmorët e Kombët”
Nga të parat që erdhi këtu, ishte kryekuvendarja Albulena Haxhiu.
“Para 28 viteve, Gllogjani u rrethua me qëllimin që të shuhet një vatër e rezistencës sonë. Por ndodhi pikërisht e kundërta. Familja Haradinaj, së bashku me luftëtarët tjerë të lirisë, me kontributin e tyre e çanë rrethimin dhe dëshmuan se përpjekja për liri as nuk rrethohet, as nuk ndalet dhe as nuk thyhet”, ka thënë Haxhiu.
Në Gllogjan, nuk munguan as këtë herë mërgimtarët nga Zvicra.
“Për ne kjo datë do të thotë gjithçka, gjithë ky dëshmorë që u vra është fitu liria. Dhimbja është e madhe për të, por ne boll krenar jemi që e ka dhënë jetën për këtë vend më mirë nuk ka se si”, i shpreh një vizitor.
Ndërsa një tjetër qytetar, tha se këto janë ditët më të mira në jetën e tij.
“Ditë më të mirë nuk kemi kurrë një herë. Ne kur i harrojmë këta kemi humbur krejt edhe ne jemi pjesë e kësaj ushtrie prej fillimit me Ramushin jemi bashkë, çdo herë që kemi diçka ne vijmë këtu rrëfemi e atëherë ecë mirë”, ka thënë një vizitor.
“Kjo datë është shumë e veçantë për të gjithë ne, për të gjithë shqiptarët. Unë ua uroj e lavdi për të gjithë dëshmorët që kanë ra për këtë vend”, ka thënë edhe një vizitore.
Homazhe për ish-bashkëluftetarët, bëri të martën edhe Uran Luzha.
“Ndjemi shumë krenar që kemi qenë pjesë edhe fatkeqësisht që nuk kemi mundur me qenë pjesë gjatë ditëve të para, por me vazhdimin e rrugës dhe betejës jam bashkëngjitë me brigadën 131 Jusuf Gërvalla dhe pastaj shumica prej nesh kemi shku edhe në brigadën 138 Agim Ramdani deri në përfundimin e luftës”, u shpreh veterani.
Beteja në Gllogjan mes Ushtrisë Çlirimtare të Kosovës dhe forcave serbe, u zhvillua vetëm 17 ditë pasi përfundoi ajo në Prekaz.
