Kryetari i Aleancës për Ardhmërinë e Kosovës, Ramush Haradinaj ka thënë se mërgata e Kosovës është bërë shembull i punës dhe përkushtimit ku do që jetojnë.
Ai ka thënë mërgata vazhdon të jetë forcë e madhe e zhvillimit të Kosovës.
“Sot, mërgata jonë është bërë shembull i punës dhe përkushtimit kudo që ata jetojnë, sikurse këtu në Gjermani të cilët me suksesin e tyre në biznes, shkencë, sport e kulturë po nderojnë gjithë kombin”, ka shkruar ai në Facebook.
Këto komente ai ka bërë pas pjesëmarrjes në Kuvendin Zgjedhor të AAK-së në Bavari të Gjermanisë, ku Selim Hoti është zgjedhur kryetar i AAK-së për rajonin e Bavarisë .
“Bashkatdhetarët tanë kanë një adresë, Aleancën për Ardhmërinë e Kosovës. Adresë për secilin bashkatdhetar që beson në Kosovën e fortë politikisht dhe ekonomikisht. Mbështetja masovike e mërgatës për Aleancën, u vërtetua edhe sot në Kuvendin Zgjedhor për rajonin e Bavarisë, ku ishim bashkë me deputeten Time Kadrijaj, kryetarin e komunës së Suharekës Bali Muharremaj, kryetarin e komunës së Rahovecit Smajl Latifi, me Blerim Kuqin e shumë kolegë e miq të tjerë. Me motivin që mërgata jonë të jetë pjesë e vendimmarrjes në Kosovë, ky Kuvend ka zgjedhur z. Selim Hoti, kryetar të AAK-së për rajonin e Bavarisë”, ka shkruar Haradinaj./teve1.info/
