Deputeti i Aleancës për Ardhmërinë e Kosovës, Ramush Haradinaj, së bashku me kolegët e tij deputetë, ka mbajtur një konferencë të jashtëzakonshme për media pas zhvillimeve në Kuvendin e Kosovës.
Haradinaj ka kritikuar deputetët e Lëvizjes Vetëvendosje për largimin nga seanca, duke thënë se ata, sipas tij, i janë shmangur përgjegjësisë për votimin e Projektligjit për Dhomat e Specializuara.
“Nuk ka logjikë me u ndërprerë seanca, me ikë deputetët kur kanë mbetur vetëm pak më shumë se 24 orë nga afati kushtetues edhe për zgjedhjen e presidentit. Është e vërtetë dhe kam paralajmëruar gjithnjë se Kurti dhe VV po e çojnë vendin në zgjedhje, por ikja nga përgjegjësia para ligjit për Dhomat e Specializuara është vërtet e dënueshme. Ne e dënojmë fuqishëm një sjellje të tillë”, tha Haradinaj.
Haradinaj ka deklaruar gjithashtu se zhvillimet e fundit mund ta çojnë vendin drejt zgjedhjeve, duke përsëritur qëndrimin e tij se Lëvizja Vetëvendosje dhe kryeministri Albin Kurti, sipas tij, po e çojnë vendin në këtë drejtim.
