Kryetari i Partisë Demokratike të Kosovës, Bedri Hamza, ka deklaruar se partia e tij nuk do të marrë më pjesë në punimet e Kuvendit dhe se çështjen do ta referojë në Gjykatën Kushtetuese.
Deklarata e Hamzës erdhi pasi vazhdimi i seancës konstituive u ndërpre sërish, pas mosvotimit të Vlora Çitakut për nënkryetare të Kuvendit nga Lëvizja Vetëvendosje.
Sipas Hamzës, PDK-ja e kishte votuar kandidatin e propozuar nga LVV-ja, Ardian Golën, ndërsa LVV-ja nuk e votoi kandidaten e PDK-së.
“Me veprimet e tyre të papërgjegjshme, joshtetërore, jo në dobi të qytetarëve, VV-ja po prodhon drama, po shpik situata të panjohura që të vazhdohet me bllokada. Prej sot, PDK-ja nuk ka asnjë arsye me marrë pjesë në punimet e Kuvendit dhe do ta dërgojmë lëndën në Gjykatën Kushtetuese. Jemi të sigurt se afatet kushtetuese kanë përfunduar më 7 gusht”, ka thënë Hamza.
Ai ka theksuar se, sipas PDK-së, afatet kushtetuese për përfundimin e procedurave kanë skaduar më 7 gusht dhe se ato nuk po respektohen.
Hamza ka thënë gjithashtu se, sipas tij, nuk po respektohet aktgjykimi i Gjykatës Kushtetuese lidhur me mënyrën e votimit të nënkryetarëve, duke theksuar nevojën për konsensus.
“Nuk ka konsensus. Ne e patëm me qëllim të konstituimit të Kuvendit, e votuam të propozuarin nga radhët e Lëvizjes Vetëvendosje, ndërsa ata nuk e kanë propozuar kandidaten”, theksoi Hamza.
Kreu i PDK-së ka përsëritur se partia e tij, nga sot, nuk do të marrë pjesë në punimet e Kuvendit dhe se çështjen do ta dërgojë për shqyrtim në Gjykatën Kushtetuese.
