Kryetari i Partisë Demokratike të Kosovës, Bedri Hamza, ka lënë të hapur mundësinë që partia të ndryshojë qëndrimin për çështjen e zgjedhjes së Presidentit, pas zhvillimeve politike të 16 shtatorit.
Pas mbledhjes së Këshillit Drejtues të PDK-së, Hamza ka thënë se situata e krijuar së fundmi përbën rrethana të reja, mbi bazën e të cilave partia do t’i përshtatë qëndrimet e saj.
“Jemi në rrethana të reja, jemi në gjendje të re, në gjendje që nuk ka të bëjë veç me të kaluarën, nuk ka të bëjë me individë. Ka të bëjë me shtetin, dhe ka të bëjë me të ardhmen e shtetit, dhe mbi bazën e këtyre rrethanave të reja ne normalisht që i ndërrojmë edhe i përshtatim edhe qëndrimet tona për çështje të cilat kanë të bëjnë me të ardhmen dhe perspektivën e shtetit”, theksoi Hamza.
I pyetur nëse PDK-ja do të mbështeste një kandidat për President të propozuar nga Lëvizja Vetëvendosje, kryetari i PDK-së, Bedri Hamza, ka thënë se për këtë çështje nuk mund të flitet pa një propozim konkret.
Ai ka bërë të ditur se ka zhvilluar takime me liderët e partive politike.
“Nuk mundem me fol në mënyrë hipotetike, para se me ardhë në këto tema. Unë jam takuar, dhe jam i gatshëm me u takuar, jam takuar me kryetarët e tri partive politike, edhe me zotin Kurti, edhe me zotin Avdixhiku, edhe me zotin Gjini, jam komunikim, dhe është krejt normale që për tema kaq të rëndësishme dhe situata kaq të rëndësishme për vendin që të ketë takime”, shtoi Hamza.
Hamza, ka thënë se draftligji i propozuar për Dhomat e Specializuara adreson, në një masë, shqetësimet e ngritura lidhur me këtë gjykatë.
Hamza ka bërë të ditur se për hartimin e draftligjit janë konsultuar ekspertë të brendshëm dhe të jashtëm, ndërsa ka theksuar se është paraparë mundësia e zhvillimit të procesit të apelit.
“Deputetët e kanë punën e vet, ne jemi konsultuar me ekspertë të brendshëm dhe të jashtëm dhe besoj që drafti i ligjit i propozuar i adreson në masë të caktuar shqetësimet të cilat kanë ndodhur rreth kësaj gjykate. Ne kemi lejuar apelin që të zhvillohet aty, dhe arsyeja pse? Sepse ne dëshirojmë t’ia dhënë edhe një mundësi kësaj gjykate që të ketë vendim të drejtë, e kanë mundësinë. Dhe sigurisht se ligji është i konsultuar dhe i draftuar nga ekspertë të fushës, të cilët kanë një përgatitje jashtëzakonisht të lartë profesionale”, ka thënë Hamza.
PDK ka kërkuar shqyrtimin institucional të kornizës ligjore të Dhomave të Specializuara dhe mbështetje të plotë institucionale për procesin gjyqësor në apel.
Kryetari i PDK-së, Hamza, ka thënë se Këshilli Drejtues i partisë ka votuar unanimisht një deklaratë për këtë çështje, duke vlerësuar se ajo tejkalon përmasat e një partie politike dhe kërkon përkrahje të gjerë institucionale e juridike.
“Ne vazhdojmë me punu që të ketë drejtësi. E kemi procesuar ligjin në kuvend, kemi kërkuar dhe kërkojmë mbështetje edhe nga partitë tjera politike, që ligji të procedohet sa më shpejtë dhe ligji të jetë në fuqi sa më shpejtë. Dhe një prej pikave të deklaratës që është votuar unanimisht në Këshillin Drejtues është shqyrtimi institucional i kornizës ligjore të dhomave të specializuara. Ky proces kërkon një përkrahje të gjithanshme edhe juridike, institucionale për shkak se është një çështje që tejkalon përmasat e një mandati, kuvendit, qeverise, presidentit, i kalon përmasat e një partie politike. UCK është më e madhe se PDK, i tejkalon përmasat e PDK-së, kur kjo është themeluar dhe ka kry punën e vet në dobi të lirisë dhe pavarësisë PDK as që ka ekzistuar. Prandaj, kjo kërkon një mbështetje të plotë institucionale për mbrojtjen juridike dhe procesin gjyqësor në apel”, tha Hamza.
Hamza sërish ka deklaruar se do të mbështesë organizimet qytetare dhe protestat kundër vendimit të Dhomave të Specializuara në Hagë.
Ndërkaq, sa i përket mbështetjes institucionale, Hamza ka thënë se ajo duhet të përfshijë edhe buxhet të mjaftueshëm dhe ndryshimin e plotësimin e udhëzimit administrativ, me qëllim që mbrojtja të jetë e barabartë me Prokurorinë dhe gjykatën në këtë proces.
