Deputeti i Partisë Demokratike të Kosovës, Përparim Gruda ka reaguar lidhur me dyshimet e ngritura për Ligjin e miratuar për Specialen rreth zbatueshmërisë së tij dhe reagimit të ndërkombëtareve.
Gruda ka thënë se ligji nuk shkel Kushtetutën dhe detyrimet ndërkombëtare të Kosovës
“Ligji për ndryshimin e Ligjit për Gjykatën Speciale është shkruar në mënyrën më të mirë të mundshme. Nuk e shkel Kushtetutën dhe nuk i shkel detyrimet ndërkombëtare të Kosovës. Është ngritur me të drejtë një shqetësim: a do ta zbatojë Gjykata Speciale këtë ligj?Gjykata Speciale deri më sot ka treguar se është e gatshme ta interpretojë ligjin dhe Kushtetutën e Kosovës sipas mënyrës së vet. Prandaj, pres që të bëjë obstruksione edhe ndaj zbatimit të këtij ligji”, ka shkruar ai në Facebook.
Ai ka folur edhe për mundësinë e respektimit të këtij Ligji nga Gjykata Speciale, duke thënë se do ta gjejnë mënyrën për ta detyruar Gjykatën Speciale ta zbatojë ligjin e Kosovës.
“Jam i bindur se do ta gjejmë rrugën juridike dhe institucionale për ta detyruar Gjykatën Speciale ta zbatojë ligjin e Republikës së Kosovës. Për këtë do të na duhet vendosmëri si shtet, si institucione dhe si shoqëri. Dhe do t’ia arrijmë”, ka shkruar Gruda.
Të martën Kuvendi i Kosovë ka votuar në lexim të dytë Ligjin për plotësim-ndryshim të Dhomave të Specializuara.
