Sulmuesi Brajan Gruda është i bindur se skuadra e Brightonit mund ta mposht Arsenalin këtë vikend në Premier League të Anglisë.
Brightoni luan në udhëtim ndaj Arsenalit në ndeshjen që luhet të shtunën nga ora 16:00 dhe i takon xhiros së 18-të.
Arsenali prinë në tabelë me 39 pikë, ndërsa Brightoni me 24 pikë të mbledhura është i dhjeti dhe Gruda beson se mund ta befasojnë ekipin e Mikel Artetas në “Emirates Stadium”.
“Do të jetë ndeshje e mirë, por unë e di se çfarë mund të bëjmë si ekip. Mund ta mposhtim secilin kundërshtar dhe nëse japim gjithçka nga vetja mund të fitojmë edhe të shtunën”, është shprehur Gruda.
Gruda 21-vjeçar, ka shënuar 1 gol dhe ka bërë 1 asistim në 13 paraqitje kampionale, ndërsa në total në 14 ndeshje në të gjitha garat për Brightonin, ka 2 gola e po aq asistime.
Ai prej vitit 2024 është pjesë e Brightonit, ekip që e transferoi për 31.5 milionë euro nga skuadra e Mainzit të Gjermanisë.
