Deputeti i Lidhjes Demokratike të Kosovës, Armend Zemaj, thotë se Qeveria e Kosovës ka premtuar investime për minatorët e minierës së “Trepës”, por që këto investime janë keqmenaxhuar.
Zemaj, thotë se keqemenaxhimet kanë ndodhur nga disa njerëz që kanë veshur petkun politik të Lëvizjes Vetëvendosje.
“Jemi në 10 ditëshin e grevës së minatorëve. Qeveria edhe këtu ka premtuar ndryshime, kishte premtuar investime. Duket se ato investime janë menaxhuar ose me mirë të them janë keqmenaxhuar nga njerëz të veshur me petkun politik të LVV-së dhe kjo e ka rritur pakënaqësinë e brendshme, ku punëtorët kanë mbetur në kushte të mjerueshme, edhe me pajisje, edhe me mjete mbrojtëse, edhe me gjëra që e ruajnë dhe sigurojnë shëndetin e tyre”, tha ai në emisionin “Info Nata” në Tëvë1.
Sipas tij, gjatë 10 ditëve të grevës së minatorëve, Qeveria është barrikaduar në mbrojtje të interesave të disa individëve të caktuar.
“Më e keqja është që për këto 10 ditë, Qeveria është barrikadu në mbrojtjen e interesave të individëve të caktuar, ndërsa aty më shumë se 200 punëtorë gjenden shumë metra thellë nën tokë duke protestuar”, shtoi ai./teve1.info/
