Anëtari i ekipit mbrojtës të Hashim Thaçit në gjykimin në Hagë, Lirim Greiçevci, ka bërë të ditur se ka zhvilluar një bisedë të drejtpërdrejtë me ish-presidentin me rastin e ditëlindjes së tij.
Përmes një postimi në rrjetet sociale, Greiçevci njoftoi se e ka uruar personalisht Thaçin, duke shtuar se gjatë komunikimit e ka informuar edhe për numrin e madh të urimeve që qytetarët kanë shpërndarë në platforma të ndryshme.
Sipas tij, shumë prej mesazheve përmbajnë dëshirën që kjo të jetë ditëlindja e fundit e Thaçit në paraburgim në Hagë.
Ai theksoi gjithashtu se ish-presidenti ka shprehur mirënjohje për mbështetjen e vazhdueshme të qytetarëve ndër vite dhe ka shprehur dëshirën që në të ardhmen t’i falënderojë ata edhe personalisht.
