Një grabitje e armatosur ka ndodhur në një banesë në Prishtinë, ku pesë persona kanë raportuar se janë sulmuar dhe grabitur nga katër persona të armatosur, të cilët kishin hyrë me forcë në banesë.
Sipas Policisë së Kosovës, rasti është raportuar më 30 korrik 2026, ndërsa ngjarja kishte ndodhur dy ditë më parë, më 28 korrik, rreth orës 19:45.
Viktimat, një grua dhe katër burra, kanë deklaruar se derisa ndodheshin në banesë, dikush kishte rënë ziles së derës. Pasi e kishin hapur, katër persona kishin hyrë me forcë në banesë dhe, nën kërcënimin e armëve, u kishin marrë telefonat mobilë dhe stolitë me vlerë.
“Me 30.07.2026 pesë viktimat, një femër dhe katër meshkuj, kanë raportuar se derisa ishin në banesën e tyre, ka rënë zilja dhe pasi kanë hapur derën, katër persona kanë hyrë brenda dhe nën kërcënimin e armës u kanë grabitur telefonat dhe stolitë që kishin në vlerë”, thuhet në raportin e Policisë së Kosovës.
Gjatë grabitjes, dy nga viktimat kanë pësuar lëndime trupore dhe kanë marrë trajtim mjekësor.
“Dy nga viktimat kanë pësuar lëndime trupore dhe kanë pranuar tretman mjekësor. Rasti vazhdon të hetohet”, njofton Policia.
Policia e Kosovës ka bërë të ditur se hetimet janë në zhvillim, me qëllim identifikimin dhe arrestimin e personave të dyshuar.
