Analisti politik, Ejup Gojnovci ka vlerësuar se rezultati i zgjedhjeve tregon një ndëshkim të përgjithshëm nga qytetarët ndaj partive politike në Kosovë, duke theksuar se asnjë subjekt nuk mund të konsiderohet fitues i qartë.
Sipas tij, humbja e mandateve nga forcat politike e bën të vështirë krijimin e një qeverie stabile, edhe në rast se kryeministri në detyrë, Albin Kurti arrin të formojë ekzekutivin me mbështetjen e komuniteteve joserbe.
“Është një humbje e mandateve e cila, edhe nëse e krijon qeverinë Kurti me minoritetet joserbe, do ta krijojë një qeveri jashtëzakonisht të brishtë, me një ose dy deputetë më tepër sesa i duhen”, deklaroi Gojnovci.
Ai theksoi se qytetarët, sipas tij, kanë ndëshkuar të gjitha partitë politike për zhvillimet e fundit në vend, duke mos qenë pjesëmarrës në zgjedhjet e 7 qershorit.
“Për logjikën time është absolutisht mashtrim optik, sepse nuk ka fitues në këto zgjedhje. As opozitarët që e shtynë vendin në zgjedhje me shumë investim politik dhe as partia më e madhe në vend, e cila humbi një numër të madh mbështetësish, veçanërisht të votës qytetare”, u shpreh ai.
Gojnovci shtoi se elektorati nuk e ka falur situatën politike që, sipas tij, ka karakterizuar vendin gjatë një viti e gjysmë të fundit.
Duke folur për mbështetjen ndaj Lëvizjes Vetëvendosje dhe liderit të saj, Albin Kurti, ai vlerësoi se një pjesë e konsiderueshme e votuesve nuk kanë votuar për shkak të programit qeverisës, por si reagim ndaj qeverisjeve të kaluara.
“Vetëvendosje dhe Kurti nuk e kanë fituar mbështetjen ngaqë kanë ofruar një mrekulli përmes programit të tyre. Një pjesë jashtëzakonisht e madhe e atyre që kanë votuar Kurtin dhe LVV-në kanë votuar sepse kanë qenë thellësisht të dëshpëruar me qeverisjen e kaluar dhe partitë që sot janë në opozitë”, deklaroi Gojnovci./teve1.info/
