Një person dyshohet se ka goditur me veturë një zyrtar policor gjatë kryerjes së detyrës zyrtare në Vushtrri dhe më pas është larguar nga vendi i ngjarjes.
Sipas raportit 24-orësh të Policisë së Kosovës, rasti ka ndodhur të shtunën rreth orës 18:50, derisa njësitet policore po menaxhonin komunikacionin.
Policia njofton se i dyshuari nuk ka respektuar urdhrat e zyrtarit policor për ndalim, e ka ofenduar atë dhe më pas e ka goditur me automjet.
Pavarësisht incidentit, polici nuk ka pësuar lëndime trupore. Ndërkohë, i dyshuari është larguar nga vendi i ngjarjes dhe aktualisht ndodhet në kërkim nga organet e rendit.
“Është raportuar se derisa njësiti policor ishte në kryerje të detyrës zyrtare duke drejtuar komunikacionin, një i dyshuar me veturën e tij nuk ka respektuar urdhrin e zyrtarit policor dhe i njëjti ka ofenduar dhe ka goditur me veturë zyrtarin policor mashkull kosovar. Viktima nuk ka pësuar lëndime ndërsa i dyshuari ndodhet në kërkim policor”, thuhet në raport.
