Burim Zymeri vazhdon ta përfaqësojë Kosovën në skenën ndërkombëtare të volejbollit, duke ndarë drejtësinë në ndeshjet e Kampionatit Evropian CEV U18, i cili po zhvillohet në Shiauliai të Lituanisë dhe Riga të Letonisë.
Përzgjedhja e gjyqtarit ndërkombëtar kosovar në mesin e vetëm tetë arbitrave të caktuar për këtë kampionat paraqet një tjetër dëshmi të besimit që Konfederata Evropiane e Volejbollit (CEV) vazhdon t’u japë zyrtarëve të volejbollit nga Kosova.
Gjatë ditëve të para të kampionatit, Zymeri ka drejtuar ndeshje të rëndësishme të fazës së grupeve, duke marrë vlerësime të larta nga Komisioni i Arbitrimit i CEV-it për profesionalizmin, saktësinë në vendimmarrje dhe performancën e tij.
Angazhimi në një nga garat më prestigjioze të kategorive të reja në Evropë konsiderohet një tjetër sukses për gjyqtarinë kosovare, duke konfirmuar nivelin e lartë të përgatitjes së arbitrave të Federatës së Volejbollit të Kosovës në arenën ndërkombëtare.
Federata e Volejbollit e Kosovës ka uruar Burim Zymerin për paraqitjet e deritanishme dhe i ka dëshiruar suksese të mëtejshme në Kampionatin Evropian CEV U18, me besimin se ai do të vazhdojë ta përfaqësojë me dinjitet Kosovën dhe volejbollin kosovar në arenën ndërkombëtare.
