Gjykata Themelore Gjilan ka sqaruar se i dyshuari për rastin e vrasjes së trefishtë të ndodhur në qendër të këtij qyteti, Mefail Shkodra nuk ka lëndë aktive në këtë gjykatë.
Ndërkohë, sa i përket dosjes së tij penale, Gjykata Themelore në Gjilan ka bërë të ditur se në bazë të evidencës Mefail Shkodra ka pasur 3 lëndë penale dhe të gjitha janë të përfunduara me aktgjykim dënues.
“Në vitin 2018 (PKR.nr.198/2018), është akuzuar për veprën penale mbajtja në pronësi, kontroll ose posedim të armëve nga neni 374 paragrafi 1 të Kodit Penal të Republikës së Kosovës është gjykuar duke shpallur fajtor të njëjtin dhe është dënuar. Në vitin 2014 (P.nr.610/2014) është akuzuar për veprën penale vjedhja e shërbimeve komunale nga neni 320 të Kodit të ri Penal të Republikës së Kosovës, i cili për këtë rast është gjykuar dhe dënuar dhe në vitin 2011 (P.nr.343/2011), është akuzuar për veprën penale shkaktimi i rrezikut të përgjithshëm neni 356 i KPRK-së, ku edhe për këtë rast është gjykuar dhe shpall fajtor nga kjo Gjykatë”, thuhet në njoftim.
E, dy të dyshuarit tjerë Edonis dhe Engjull Shkodra, thuhet se nuk figurojnë në regjistrin e evidencës penale të Gjykatës për ndonjë vepër penale të gjykuar me vendim të plotëfuqishëm apo ndonjë rast të papërfunduar.
