Kandidati i Aleancës për kryeministër dhe kryetar i kësaj partie, Ardian Gjini, ka prezantuar një nga prioritetet e programit të tij qeverisës, duke vënë theksin te mbështetja për sektorin e bujqësisë dhe prodhuesit vendorë.
Gjini ka thënë se një qeveri e udhëhequr nga ai do të synojë heqjen e taksave që, sipas tij, rëndojnë mbi tokat e kultivuara dhe familjet që merren me prodhim bujqësor.
Ai ka theksuar se asnjë sipërfaqe e mbjellë dhe asnjë familje prodhuese nuk duhet të përballet me ngarkesa të larta fiskale, duke e konsideruar këtë si një barrë që pengon zhvillimin e bujqësisë.
Sipas tij, heqja e këtyre obligimeve do të shërbejë si mbështetje direkte për fermerët dhe do të krijojë kushte më të favorshme për rritjen e prodhimit vendor.
