Për shkak se afër gjenden trupat ruse, hetuesit ukrainas zgjodhën një ditë me shi për të bërë zhvarrosjen e trupave të tyre, transmeton teve1.info.
Hetuesi mjeko-ligjor Sergej Shishkov tha për Associated Press se burrat u vranë në një ofensivë ruse në fshatin afër Borova në kufirin e Kharkiv me rajonin Luhansk në prill.
Ai shtoi se anëtarët e komunitetit i kishin informuar autoritetet për vendin e varrimit pasi zona u rimor nga forcat ukrainase në kundërsulmin e tyre të fundit në shtator.
“Më 13 prill 2022 luftëtarët tanë u vranë në luftime dhe u varrosën në këtë vend. Tani për tani, ka të ngjarë të jenë rreth 17 luftëtarë të Forcave të Armatosura të Ukrainës këtu. Vendasit i varrosën ata dhe po kujdeseshin për varrin”, tha ai.
Ndërkohë, presidenti i Ukrainës, Volodymyr Zelenskyy, me anë të një video-adresimi përgëzoi ushtarët ukrainas për luftimet e vazhdueshme në fronte të shumta me trupat ruse në Donbas.
“Të gjithë ushtarët tanë që mbajnë pozicione në rajonin e Donetskut janë thjesht heronj. Dua t’i përgëzoj ushtarët e Brigadës së 25-të Ajrore të Ukrainës për trimërinë e tyre në çlirimin e territoreve të pushtuara në rajonin e Luhanskut. Në përgjithësi, ne po forcojmë pozicionet tona kudo në fronte, duke ulur aftësitë e pushtuesve, duke shkatërruar logjistikën e tyre dhe duke përgatitur një lajm të mirë për Ukrainën”, shtoi ai.
Donetsk së bashku me Luhansk, Zaporizhzhia dhe Kherson janë rajone të aneksuara nga Moska në Ukrainë.
Për shkak se Ukraina po synon të rikthej territore atje, presidenti rus, Vladimir Putin, më shumë se një javë më parë shpalli gjendje lufte në këto rajone .
