Një person është gjetur pa shenja jete të premten në mëngjes, në rrugën “Enver Maloku”, në lagjen “Bregu i Diellit” në Prishtinë.
Lajmin e ka konfirmuar zëdhënësi i Policisë së Kosovës për rajonin e Prishtinës, Enis Pllana.
“Sot rreth orës 08:00 kemi pranuar informatën për një person pa shenja jete në rrugën ‘Enver Maloku’ në Prishtinë. Vdekjen e viktimës e ka konstatuar ekipi mjekësor në vendin e ngjarjes”, ka deklaruar Pllana.
Sipas tij, policia, në koordinim me prokurorin e shtetit, ka nisur hetimet për rastin.
Pllana ka bërë të ditur se ekipet policore po ndërmarrin veprimet e nevojshme hetimore dhe po kryejnë ekzaminimet në vendin e ngjarjes, me qëllim të sqarimit të plotë të rrethanave të vdekjes.
