Ministrja e Punëve të Jashtme dhe Diasporës, Donika Gërvalla-Schwarz ka pritur në një takim ambasadorët e shteteve të QUINT-it në OSBE.
Kryediplomatja theksoi vullnetin dhe gatishmërinë e Kosovës për t’u anëtarësuar në OSBE.
“Ministrja Gërvalla vuri në pah rolin e rëndësishëm të OSBE-së në të kaluarën dhe theksoi vullnetin dhe gatishmërinë e Republikës së Kosovës për t’u anëtarësuar sa më parë në këtë organizatë. Temë e bisedës ishin edhe siguria në Kosovë, rajon dhe Evropë, të drejtat e njeriut dhe të minoriteteve në Republikën e Kosovës dhe në Serbi, dialogu me Serbinë, ndikimi rus dhe roli destruktiv i Serbisë në raport me Evropën, Ukrainën dhe shtetet e Ballkanit Perëndimor”, thuhet në një njoftim të MPJ-së.
Po ashtu Gërvalla theksoi se Kosova është në bashkëpunim të ngushtë me partnerët, për të arritur marrëveshjen finale me Serbinë me njohjen reciproke në qendër.
