Me ftesë zyrtare të Zëvendëskryeministrit dhe Ministrit të Punëve të Jashtme të Italisë, Antonio Tajani, ministrja në detyrë e Punëve të Jashtme dhe Diasporës, Donika Gërvalla, mori pjesë në Konferencën e Parë Ndërkombëtare të Italofonisë në Romë.
Konferenca, e para e këtij formati, konfirmoi Italofoninë si një hapësirë të rëndësishme bashkëpunimi politik, kulturor dhe institucional, ku gjuha italiane shërben si urë lidhëse mes shteteve, popujve dhe komuniteteve.
Gjatë fjalës së saj, Gërvalla vuri në pah rolin vendimtar të Italisë në sigurinë e vendit, përmes pjesëmarrjes së ushtarëve italianë në KFOR që nga viti 1999, si dhe solidaritetin e shoqërisë civile italiane në rindërtimin pasluftës.
Ajo theksoi gjithashtu ndikimin e kulturës italiane, përfshirë rolin e komuniteteve arbëreshe që kanë ruajtur gjuhën dhe identitetin shqiptar në Itali.
“Kosova dhe Italia do të vazhdojnë të jenë krah për krah në fushën e sigurisë, në mbrojtjen e demokracisë dhe në rrugëtimin tonë euroatlantik”, theksoi ajo.
Gërvalla gjithashtu nënvizoi rëndësinë e gjuhës italiane për rininë kosovare, mërgatën dhe për shtetin, si një urë lidhëse mes dy popujve.
Në përfundim, ajo falënderoi Ministrin Tajani për mbështetjen e vazhdueshme dhe organizimin e konferencës, duke theksuar se kjo iniciativë thellon partneritetin strategjik mes Kosovës dhe Italisë.
