George Clooney, 64 vjeç, ka reflektuar mbi karrierën dhe famën, duke treguar se përvojat familjare, veçanërisht ato të hallës së tij, këngëtares së njohur Rosemary Clooney, kanë ndikuar fort në mënyrën se si ai e sheh suksesin.
Gjatë një sesioni pyetje-përgjigje pas shfaqjes së filmit të ri “Jay Kelly” në Festivalin e 63-të të Filmit në Nju Jork, aktori kujtoi se halla e tij ishte bërë një yll i madh që në moshën 19-vjeçare, por ndryshimet në industrinë muzikore me ardhjen e rock and roll-it i ndërprenë papritur karrierën.
“Ajo e përballoi keq këtë situatë, u var drogës dhe alkoolit, bëri zgjedhje të gabuara dhe iu deshën afro 40 vjet për të rikthyer karrierën”, tha Clooney.
Aktori shtoi se mësimi më i madh që nxori ishte fakti se fama nuk është gjithmonë në duart e individit.
“Ajo që kuptova është se fama ka shumë pak lidhje me ty dhe shumë më tepër me rrethanat, skenarin, regjisorin dhe aktorët e jashtëzakonshëm përreth”, u shpreh ai.
Filmi “Jay Kelly”, i regjisorit Noah Baumbach, sjell Clooney në rolin e aktorit të famshëm Jay Kelly, ndërsa Adam Sandler luan menaxherin e tij Ron.
Historia ndjek udhëtimin e tyre në Europë, ku përballen me zgjedhje jetësore, marrëdhënie dhe pyetjen se çfarë trashëgimie do të lënë pas.
Në kast janë gjithashtu Laura Dern dhe Billy Crudup.
Ky projekt shënon rikthimin e parë të Baumbach pas “White Noise” (2022), duke premtuar një rrëfim të thellë mbi jetën, famën dhe ndikimin e familjes në karrierë.
