Humbja në finale të Kupës së Kosovës, ka qenë me pasoja për skuadrën e Ferizajt. Një ditë pasi skuadra u mposht në finale nga Dukagjini, e me këtë duke e siguruar pjesëmarrjen në garat evropiane, kualifikimet për Ligën e Konferencës, Ferizaj pas rënies nga Superliga, pësoj një tjetër goditje të rëndë, që sipas drejtuesve të klubit, u është bërë me qëllim dhe pa të drejt.
Një ditë pas ndeshjes, drejtori sportiv i kësaj skuadre dhe ish-futbollisti i mirënjohur Genc Hyseni ka dhënë dorëheqje nga klubi.
Ai ka qenë shumë i ashpër në reagimin e tij në Facebook, duke akuzuar Federatën e Futbollit të Kosovës, duke u larguar nga klubi dhe nga futbolli.
Finalja e Kupës së Kosovës, e cila i takoi Dukagjinit, është përcjell me shumë vendime të dyshimta nga gjyqtari Genc Nuza dhe me tensione në fushë.
Postimi i plotë nga Genc Hyseni
Kjo është fytyra e vërtetë e FFK-së. Sot nuk po flasim për futbollin, por për padrejtësi. Sa e sa ndeshje na u mohuan me padrejtësi, na dëmtuan vazhdimisht. I mbyllëm sytë dhe na rrëzuan nga Superliga. Na e vodhën edhe finalen që e ëndërruam me vite.
A nuk ju vjen gjynah dhe marre? Ne po rrisim fëmijë. Zoti ju vraftë! Do t’ju zërë djersa dhe haku i djemve që dhanë shpirtin në fushë.
Nga sot nuk do të jem më pjesë e klubit dhe e futbollit. Jam munduar ta ndihmoj klubin e qytetit tim pa asnjë fije interesi personal. Padrejtësitë që i pashë nga gjysmësezoni deri te finalja ishin të papranueshme.
E ju servilë që i mbyllni sytë, argatë të FFK-së, po jetoni pa dinjitet.
