27 vjeçari afgan u largua nga vend i tij disa ditë më parë, kjo pasi situata atje u rëndua pas ardhjes në pushtet e talebanëve.
Ahmad Shaker tani është strehuar në Kosovë, pasi u detyrua të braktisë vendlindjen atje ku detyrën e gazetarit e ushtroi që nga viti 2012.
“Media për të cilën kam punuar ka qenë e themeluar nga ushtria, andaj talebanët gjithmonë e kanë konsideruar atë si media që ka lidhje me (Abraat Country) dhe se gazetarët aty janë spiunë të atij shteti. Për shkak të kësaj talebanët më përndoqën dhe u krijua një ide nga ta se duhet të vritet secili gazetar që ka lidhje me atë medie. Kështu që ishte një sfidë e madhe për mua dhe kolegët e mi”, deklaroi ai.
Kërcënimi nga talebanët ishte i pashmangshëm edhe tek ai.
Ai kujton momentin kur ata hynë në shtëpinë e tij dhe thyen të gjitha pajisjet gazetareske.
“Një taleban më thirri dhe u prezantua si një oficer i talebanëve dhe më tha se donte të takohej me mua. E di që ju jeni Ahmad Shaker dhe ju bëni këtë punë, andaj vetëm dua të ju shoh. I thashë nuk jam afër, jam në anën tjetër dhe nuk mund të takohemi. Më pas ata erdhën në shtëpinë time dhe thyen të gjitha pajisjet e mia gazetareske si tripodin, kamerën , laptopin dhe gjëra të tjera”, tha Shaker.
Edhe gjatë strehimit në vend, Shaker vazhdon ta mbajë mendjen tek kolegët e tij gazetarë.
“Ka shumë gazetarë që janë ende në Afganistan dhe të cilët mbijetojnë në mënyra të ndryshme. Disa nga ta rrinë të heshtur dhe nuk thonë asgjë duke u munduar të shpëtojnë jetën e tyre. Sepse është shumë e vështirë të bëjnë diçka. Disa nga ta e kanë ndryshuar mendim. Ndoshta jo mendimin, por janë të detyruar të pretendojnë ashtu, pasi thonë se talebanët janë mbi ne dhe ne nuk duhet të themi asgjë për ta. Ata vetëm vazhdojnë me punën e tyre si gazetarë por megjithatë ata janë në një gjendje shumë të keqe. Jam në kontakt me ta dhe di për gjendjen e tyre”, shtoi ai.
Sipas tij, është një lloj tjetër i islamit- radikal që talebanët thonë, por nuk është i vërteti. Ata e lejojnë një gazetarë të punojë vetëm nëse ata e pranojnë fenë e tyre dhe bëjnë çfarë thonë ata.
Kronika e realizuar nga gazetarja Lendrina Kodrolli.
