Shefi i Grupit Parlamentar të Lidhjes Demokratike të Kosovës (LDK), Arben Gashi, ka deklaruar se Radio Televizioni i Kosovës ka dështuar të ofronte shërbimin e tij në interes publik për shkak të siç është shprehur politizimit dhe nxjerrjes së lajmeve me porosi nga Lëvizja Vetëvendojse.
Gashi ka thënë se për këtë arsye Lidhja Demokratike e Kosovës (LDK), ka marrë vendim të mos jetë pjesë e këtij institucioni në debate dhe emisione.
“Si rezultat i politizimit dhe nxjerrjes së lajmeve në RTK me porosi nga Lëvizja Vetëvendosje dhe struktura jashtë institucionale të cilat e kontrollojnë LVV-në, RTK dështoi që të ofronte shërbimin e tij si institucion publik dhënien e lajmit dhe informacionit në interes publik. Si rezultat i këtij dështimi, politizimi dhe kapje nga LVV-ja dhe personi kontrollues që e kontrollon, LDK-ja morri vendim dhe refuzoi çdo pjesëmarrje në debate dhe emisione të RTK-së si institucion publik. Kur si rezultat i ndërhyrjes së LVV-së, kapjes së bordit, kapjes së politikës redaktuese dhe dhënies së lajmeve të pavërteta u dëmtua interesi publik, u politizua institucioni, u shkatërrua besimi ne refuzuam të jemi pjesë e kësaj ndërmarrje”, ka thënë Gashi në seancën plenare ku po diskutohet për shkarkimin e anëtarëve të bordit të RTK-së.
Në seancën plenare ku po shqyrtohet propozimi i gjashtë deputetëve të PDK-së, për shkarkimin e anëtarëve të Bordit të RTK, deputetët e Lëvizjes Vetëvendosje kanë lëshuar sallën e Kuvendit.
Deputeti i VV-së, Valon Ramadani, gjatë seancës ka thënë se ky medium nuk është kapur nga askush./teve1.info/
