Avokati, Tomë Gashi ka paralajmëruar se nëse partitë opozitare nuk e votojnë Glauk Konjufcën për kryeministër, qytetarët mund t’i fajësojnë për bllokimin e funksionimit të shtetit.
Ai ka shtuar se VV-ja ka 56 vota, por për të arritur shumicën prej 61 deputetësh i duhen edhe 5–6 vota shtesë dhe deputetët që refuzojnë t’i japin këto vota mund të konsiderohen si bllokues të shtetit.
“Mendoj se nëse nuk ndodh votimi i qeverisë Konjufca, partitë opozitare qytetarët mund t’i fajësojnë lirshëm në zgjedhjet e ardhshme, qoftë ato të rregullta apo të parakohshme, sepse në mënyrë direkte do të vërtetohet kush po e bllokon funksionimin e shtetit pas zgjedhjeve. Ne dëshirojmë të kemi qeveri pas zgjedhjeve, që është edhe qëllimi pse kemi dalë në zgjedhjet e kaluara. Nëse bllokohet nga partitë opozitare me vetëm 5 apo 6 vota, kjo mund t’iu reflektojë në zgjedhjet e ardhshme. VV-ja ka 48 deputetë, dhe janë bashkuar edhe 8 apo 9 deputetë të pakicave jo-serbe, duke e çuar numrin maksimal në 56. Për këtë arsye, po them se 5 deputetë nuk mund të pengojnë funksionimin e Kosovës, por nëse vendosin ta çojnë vendin në zgjedhje të shpeshta dhe të mos votojnë qeverinë, atëherë do të identifikohen si bllokues të shtetit”, ka thënë Gashi në emisionin “Ditari” në Tëvë1.
Ndryshe, Lëvizja Vetëvendosje të martën ka propozuar nënkryetarin e kësaj partie, Glauk Konjufca për mandatar për kryeministër të Kosovës.
LVV-ja tha se pret “reflektimin” e partive të tjera shqiptare sa i përket formimit të Qeverisë së re të Kosovës, por ato insistuan në mbajtjen e zgjedhjeve parlamentare./teve1.info/
