Deputeti i LDK-së, Arben Gashi, ka deklaruar se pas bashkëpunimit të fundit mes Lëvizjes Vetëvendosje dhe PDK-së, përfshirë miratimin e ndryshimeve për Ligjin për Specialen dhe çështjen e presidentes, është koha që bashkëpunimi politik të mos përdoret më për demonizimin e kundërshtarëve.
Përmes një postimi në Facebook, Gashi ka theksuar se fokusi duhet të jetë te rezultatet e qeverisjes dhe ajo që partitë sjellin për vendin, e jo te arsyetimet dhe fajësimet për të kaluarën.
Ai ka thënë se qytetarët presin zhvillim, siguri dhe shpresë për të ardhmen.
Sa i përket LDK-së, Gashi ka vlerësuar se partia duhet ta përcaktojë qartë drejtimin e saj politik, duke mos u mbështetur në vija të kuqe të përhershme, por në parime të qarta.
Sipas tij, e kaluara nuk duhet të harrohet, por as të shndërrohet në pengesë për të ardhmen.
“ Këtu fillon rilindja jonë: me më shumë besim, bashkim dhe një politikë moderne, që i përfaqëson qytetarët dhe u jep shpresë për të ardhmen”, ka shkruar Gashi.
Ai e ka përmbyllur mesazhin me thirrjen se tash është koha për LDK-në./teve1.info/
