Arben Gashi, kryetar i Grupit Parlamentar të Lidhjes Demokratike të Kosovës ka deklaruar se sjelljet e qeverisë dhe kryeministrit Albin Kurti e kanë sjellë vendin nën sanksione.
Gashi në Kuvendin e Kosovës tha se Kurti gjatë takimit të djeshëm në Bruksel e ka pranuar draft statutin e Asociacionit.
“Kemi një sjellje të Qeverisë dhe kryeministrit në vazhdimësi që refuzon bisedimet me partnerët ndërkombëtarë, duke shkaktuar efekt negativ për vendin deri në arritjen e sanksioneve. Me atë çka pamë dje Kurti ka pranuar një draft të statutit të Asociacionit të paktën kështu e tha dje ai vet”, tha ai.
Tutje Gashi sjelljet e Kurtit në raport me ndërkombëtarët dhe dialogun i cilësoi si arrogante, derisa theksoi se nuk mundet një kryeministër të shkoj në bisedime duke menduar se si mendon një militant.
“Kosova nën sanksione, kryeministri nuk raporton në Kuvend. Kryeministri pranon Asociacionin nuk raporton në Kuvend, nuk i njofton qytetarër e Kosovës , si mund të pranohet një sjellje e tillë dhe si mund të sillemi dikur gjithçka është normale. Sjellja arrogante, përplasja me partnerët ndërkombëtarë, duke shku në bisedime e duke mendu për militantë atje, se si e sheh ai militanti komandant tastiera të ardhmen e Kosovës, është gabim. Ja kemi thënë gjithmonë ia përsërisim edhe sot, nuk mundesh me qenë një kryeministër i mirë i një vendi kur mendon se qysh ka mendu një militant. Dukesh me konë i përgjegjshëm. Krejt kjo sjellje është e papranueshme duhet të vijë të raportojë në Kuvend”, shtoi Gashi.
Paraprakisht, Partia Demokratike e Kosovës (PDK) u deklarua pro iniciativës së AAK-së për të mbështetur Rezolutën e miratuar në Parlamentin Evropian më 19 tetor, mbi zhvillimet e fundit në dialogun Serbi – Kosovë, përfshirë situatën në komunat veriore të Kosovës./teve1.info./
