Francezi Jean-Denys Choulet do të jetë selektor i Kombëtares së Kosovës në basketboll për tri vitet e ardhshme.
Choulet që në këtë post zëvendësoi Rami Hadarin, të hënën është prezantuar në konferencën për shtyp të mbajtur nga FBK-ja, ku krahas trajnerit francez ishin edhe sekretarja e përgjithshme Elvira Dushku dhe koordinatori i kombëtares, Adriatik Rraci.
Choulet zbuloi se vendosi të marrë drejtimin e Kosovës me synimin për ta rritur nivelin e paraqitjeve të mira në arenën ndërkombëtare, gjë që do ta kërkoj qysh në ndeshjet e këtij muaji në kuadër të parakualifikimeve për Botërorin 2027.
“Dardanët” më 21 nëntor do të përballen me Zvicrën, ndërsa tri ditë më vonë do të kenë punë edhe me Irlandën, ndeshje këto që do t’i luajnë në udhëtim.
Kosova ka një fitore dhe një humbje. Sfidat e fundit, “Dardanët” do ti kenë në shkurt të vitit të ardhshëm, kur do të luajnë në shtëpi me Zvicrën dhe Azerbajxhanin.
Tekniku francez shtoi se puna e tij do të fokusohet në ndërtimin e një grup që punën me përkushtim të madh duyke përfshirë basketbollistë të rinj vendorë dhe se në kombëtare do të ftohen vetëm ata lojtarë që japin maksimumin në parket.
Choulet ka përcjell nga afër disa prej ndeshjeve të luajtura të shtunën dhe të dielën në Superligën e Kosovës për të parë formën e lojtarëve që i ka përfshirë në listën e gjërë.
Choulet zyrtarisht punën e tij te Kosova do ta nis të martën kur edhe do të grumbullohen “Dardanët” për t’u përgatitur sa më mirë për ndeshjet e nëntorit.
Në anën tjetër, koordinatori Rraci bëri të ditur se FBK-ja, kishte shumë opsione për stolin e selektorit por shtoi se zgjodhën francezin Choulet për shkak të përvojës së madhe në arenën ndërkombëtare.
