Ndeshja në Bukuresht ndërmjet Rumanisë dhe Kosovës pritet të jetë vendimtare për vendin e parë në Grupin C2 të Ligës së Kombeve.
Për shkak të incidenteve që kanë ndodhur në ndeshjet e kaluara nga tifozët, edhe në këtë ndeshje situata pritet të jetë e tensionuar.
Dhe për këtë, Federata e Futbollit e Kosovës ka dalë me njoftim për “Dardanët”, të cilët do të jenë të pranishëm në “Arena Nationala” në Bukuresht, në përkrahje të Kosovës.
“Vendtakimi do të jetë në rrugën Major Coravu, në orën 20:30 (sipas kohës lokale në Bukuresht) nga ku tifozët do të nisen në mënyrë të koordinuar nën përcjelljen e organeve të rendit deri te stadiumi, teksa ndeshja fillon në orën 21:45 (sipas kohës lokale në Bukuresht). Ky vendtakim është i vlefshëm për të gjithë tifozët, pavarësisht nëse posedojnë bileta për tribunën veriore apo Kategorinë 1. Për sigurinë dhe mbarëvajtjen e këtij organizimi, FFK u bën thirrje të gjithë tifozëve që të respektojnë udhëzimet e dhëna nga organizatorët dhe autoritetet e rendit”, ka shkruar FFK-ja të premten.
