Federata e Futbollit të Kosovës (FFK), të enjten ka njoftuar se i është drejtuar Gjykatës së Arbitrazhit Sportiv (CAS) lidhur me vendimin e UEFA-s për ndeshjen Rumania – Kosovë, të zhvilluar më 15 nëntor në Bukuresht.
Ndeshja ishte ndërprerë të minutat shtesë kur rezultati ishte 0:0 pas një acarimi në fushë të lojtarëve që pasoi me thirrje “Serbia, Serbia” nga tifozët rumunë.
Lojtarët e Kosovës lëshuan fushën, ku disa prej tyre bënë veprime josportive ndaj tifozëve rumunë deri po largoheshin dhe refuzuan të kthehen përkundër që gjyqtari insistoi se ata të dalin sërish për të vazhduar ndeshjen.
Një orë pas ndërprerjes, gjyqtari dhe lojtarët e Rumanisë u kthyen në fushë, ku u sinjalizua fundi i ndeshjes.
UEFA ka regjistruar ndeshjen e ndërprerë me rezultat zyrtar 3:0 në favor të Rumanisë, ndërsa federatën rumune e ka gjobitur me 128 mijë euro si dhe e ka dënuar me një ndeshje pa shikues.
Në anën tjetër, FFK-ja ka marrë një gjobë prej 6 mijë eurosh kurse CAS-it i është drejtuar për të kërkuar drejtësi ndaj vendimit të UEFA-s.
“FFK-ja përveç angazhimit të ekipit të vet ligjor, është në konsultim edhe me disa studio ligjore me përvojë të madhe me lëndët në CAS, kryesisht nga Zvicra dhe Gjermania, për t’ u përfaqësuar në mënyrën e vet më të mirë në këtë betejë ligjore në kërkim të së drejtës për Federatën dhe ekipin tonë Kombëtar. Federata e Futbollit e Kosovës shpreh besimin e saj të plotë që CAS do të marrë vendim të drejtë e meritor”, shkruan në njoftimin e FFK-së.
Dy ditë më parë, federata rumune njoftoi se i i është drejtuar CAS-it për gjobën prej 128 mijë eurove, dënimin për zhvillimin e ndeshjes së ardhshme të Rumanisë pa shikues dhe për të shprehur pakënaqësinë ndaj gjobës për FFK-në.
