Mirëpo, sipas tij kjo çështje bëhet ende më e rëndë duke pasur parasysh rëndësinë që ka Kroacia, ku Berishaj është ambasador.
“Ajo çfarë është më shqetësuese ka të bëjë me imazhin e vendit tonë, imazhin e diplomacisë dhe faktin që çdo orë e më shumë që ne mbajmë një ambasador të tillë në Zagreb është shumë negative dhe me një konotacion degradues për marrëdhëniet diplomatike mes dy vendeve, e sidomos duke pasur parasysh rëndësinë që ka Republika e Kroacisë për vendin tonë”, tha Fetoshi në emisionin “Këndi i Debatit” në Tëvë1.
Ai gjithashtu bëri të ditur se Agjencia e Antikorrupsionit në Kosovë tashmë ka filluar një procedurë lidhur me deklarimin e pasurisë së Berishaj brenda vendit tonë.
“Pra unë me sa di, Agjencia e Antikorrupsionit të Kosovës ka filluar një procedurë që lidhet me deklarimin e pasurisë nga ambasadori brenda vendit tonë, dhe e dyta mendoj se deri sa ka imunitet nuk mund të hetohet askush, pra një ambasador i vendit tonë nuk mund të hetohet”, tha tutje ai.
Përndryshe, ditë më parë mediat në slloveni kanë raportuar për përfshirjen e ambasadorit të Kosovës në Kroaci, Martin Berishaj në një aferë korruptive.
