Ferizaj ka marrë një fitore të rëndësishme në luftën për mbijetesë, pasi e mposhti Llapin në shtëpi.
Ndeshja e luajtur të mërkurën dhe që i takoi xhiros së 24 të Superligës së Kosovës në futboll, përfundoi me shifrat 2:1 në të mirë të Ferizajt.
Me këtë fitore, Ferizaj ka ikur nga pozita e fundit në tabelë dhe tani ka 24 pikë të mbledhura, pesë më pak se Llapi që regjistroi humbjen e tretë rresht.
Ferizaj triumfoi me përmbysje, pasi ishte në disavantazh prej fillimit të ndeshjes.
Në minutën e 11-të, Gerhard Progni e kaloi në epërsi Llapin duke shënuar nga afërsia.
Megjithatë, Ferizaj nuk u dorëzua dhe fund të pjesës së parë, saktësisht në minutën e parë të kohës shtesë, barazoi me golin e Edon Sadriut. I njëjti futbollist shënoi edhe golin e dytë personal dhe të fitores për Ferizajn në fillimtë pjesës së dytë. Sadriu realizoi në minutën e 58-të pas asistimit të Betim Haxhimusës.
