Federata e Çiklizmit e Kosovës ka njoftuar iniciativën për ndërtimin e një Velodromi Multifunksional Olimpik, projekt ky me rëndësi të veçantë kombëtare, në kuadër të përgatitjeve për Lojërat Mesdhetare Prishtina 2030. Sipas federatës, Kosova nuk ka ende një velodrom, gjë që kufizon zhvillimin e çiklizmit profesional dhe organizimin e garave ndërkombëtare.
Velodromi do të ketë pistë olimpike 250 metra, të certifikuar nga Union Cycliste Internationale (UCI), me kapacitet për 3.000–5.000 spektatorë. Hapësira qendrore do të shërbejë si qendër multifunksionale sportive, ku do të zhvillohen aktivitete si basketboll, volejboll, futsall, xhudo, mundje, boks dhe trajnime fizike e rehabilituese. Projekti synon të krijojë kushte për zhvillimin profesional të sporteve, të nxisë pjesëmarrjen e të rinjve dhe të kontribuojë në turizmin sportiv dhe imazhin ndërkombëtar të Kosovës.
Federata i ka bërë thirrje Qeverisë, Ministrisë së Kulturës, Rinisë dhe Sportit, Komunës së Prishtinës dhe Komitetit Organizativ të Lojërave Mesdhetare që projekti të trajtohet si prioritet kombëtar strategjik dhe të përfshihet në planifikimin e infrastrukturës sportive për vitin 2030 dhe më tej. Sipas tyre, investimi në këtë velodrom është investim në sport, në rini dhe në të ardhmen e vendit.
