Komuna e Gjakovës ka njoftuar se, si pasojë e reshjeve të mëdha të shiut, në disa lagje të qytetit janë kryer evakuime të familjeve të prekura nga vërshimet.
Sipas njoftimit zyrtar, evakuime janë realizuar në lagjet Dardania, Brekoci dhe Fshati i Gjelbërt, ndërsa për familjet që kanë pasur nevojë për strehim, komuna ka siguruar akomodim të përkohshëm në banesat sociale.
“Si pasojë e reshjeve të shumta, lumenjtë në territorin e komunës së Gjakovës kanë shkaktuar vërshime në disa zona të caktuara.Për menaxhimin e situatës është formuar Shtabi Lokal për Menaxhimin e Krizave, me pjesëmarrjen e të gjitha institucioneve përkatëse”, thuhet në njoftim.
Tutje, bëhet e ditur se zjarrfikësit janë vazhdimisht në terren duke ndihmuar qytetarët, ndërsa kompania “Çabrati” po angazhohet në pastrimin e urave dhe zonave më problematike.
Situata po monitorohet edhe nga Policia e Kosovës, e cila ka konfirmuar se gjendja është nën kontroll dhe se nuk ka dëme në njerëz, por vetëm dëme materiale.
Komuna e Gjakovës ka apeluar tek qytetarët që gjatë 24 orëve të ardhshme të jenë të kujdesshëm, të shmangin lëvizjet pranë lumenjve dhe për çdo problem të njoftojnë ekipet emergjente, Policinë apo Zjarrfikësit.
