Derisa po afrohet përfundimi i afatit për deklarimin e pjesëmarrjes në zgjedhjet e 7 qershorit, partitë politike në Kosovë po vazhdojnë t’i dorëzojnë njoftimet e tyre në Komisionin Qendror të Zgjedhjeve.
Deri tani, një pjesë e subjekteve politike kanë konfirmuar pjesëmarrjen, ndërsa disa të tjera kanë njoftuar se nuk do të garojnë, si dhe është regjistruar edhe një koalicion mes partive.
Zëdhënësi i KQZ-së, Valmir Elezi, ka bërë të ditur për tëvë1.info se procesi është ende në zhvillim dhe se afati përfundon më 7 maj.
“Është duke vazhduar periudha për partitë politike të regjistruara në Republikën e Kosovës për ta njoftuar KQZ-në për: pjesëmarrje ose mospjesëmarrje në zgjedhje dhe formim të koalicioneve. Kjo periudhë ka filluar më 1 maj dhe do të përfundojë më 7 maj. Deri më tani (e mërkurë, 6 maj 2026, ora 12:00) KQZ ka pranuar njoftimin për pjesëmarrje në zgjedhje nga 18 parti politike, mospjesëmarrje nga 4 parti politike dhe 1 koalicion i përbërë nga 2 parti politike”, tha Elezi.
Sipas Elezit, afati për aplikim për certifikim të subjekteve të reja politike ka filluar më 2 maj dhe do të përfundojë më 12 maj.
“Duke filluar nga data 2 maj dhe deri më 12 maj, subjektet e reja politike (koalicionet, nismat qytetare dhe kandidatët e pavarur) duhet të dorëzojnë në KQZ, respektivisht në Zyrën për Regjistrim, Certifikim dhe Kontrollin Financiar, aplikimin për certifikim për pjesëmarrje në zgjedhjet e parakohshme për Kuvendin e Kosovës. Sipas Ligjit për Zgjedhjet e Përgjithshme, partia politike konsiderohet automatikisht e certifikuar, andaj ky proces do të vlejë vetëm për subjektet e reja politike, që në këtë rast janë koalicionet, nismat qytetare dhe kandidatët e pavarur”, tha Elezi./teve1.info/
