Ministria për Punë, Familje dhe Vlerat e Luftës Çlirimtare ka njoftuar se janë ekzekutuar shtesat për lehona në vlerë prej 500 eurosh.
Ky vendim vjen pasi Qeveria në detyrë, të premten, miratoi rritjen e shtesave për nënat lehona.
Kryeministri në detyrë, Albin Kurti, deklaroi se rritja e shtesave lidhet me rritjen e pagës minimale në vend.
“Nga ky muaj do të rrisim shtesat për lehona. Derisa me qeverisjet e kaluara shtesat për lehona ishin zero, për herë të parë e nisëm duke paguar nga 170 euro për 6 muaj për lehonat e papuna dhe tre muaj për të punësuara. Shtesat i nisëm aq sa ishte paga minimale, kurse në maj vitin e kaluar i rritëm në 325 euro. Sivjet pagën minimale e rritëm përsëri, nga 1 korriku bëhet 500 euro. Edhe në këtë maj po i rrisim shtesat për lehona, nga 325 në 500 euro në muaj”, ka deklaruar Kurti.
Ndërkohë, vetëm disa ditë para mbajtjes së zgjedhjeve të reja parlamentare, Qeveria në detyrë ka ndarë edhe nga 100 euro për pensionistët, fëmijët, sektorin jopublik dhe studentët./teve1.info/
