Policia e Kosovës ka njoftuar se në dy raste të ndara janë realizuar ekstradime të personave të kërkuar me letër rreshtim ndërkombëtar, në bashkëpunim me autoritetet e Kroacisë dhe Suedisë.
Sipas njoftimit zyrtar, ekstradimet janë kryer në bazë të legjislacionit në fuqi dhe bashkëpunimit të ngushtë ndërinstitucional mes Republikës së Kosovës dhe shteteve përkatëse.
Në rastin e parë, më 30.04.2026, Drejtoria për Bashkëpunim Ndërkombëtar Policor, në koordinim me njësitet relevante dhe institucionet e drejtësisë, ka realizuar ekstradimin e një shtetasi kosovar nga Kroacia në Kosovë.
I dyshuari ishte arrestuar nga autoritetet kroate pasi kërkohej përmes INTERPOL-it me letër rreshtim ndërkombëtar, për veprat penale “posedim, shpërndarje dhe shitje e substancave narkotike” si dhe “posedim të paautorizuar të armëve”.
Ai dyshohet se i ishte shmangur drejtësisë.
Pas ekstradimit, i njëjti i është dorëzuar njësive kompetente policore për procedura të mëtejshme ligjore.
Në rastin e dytë, më 01.05.2026, është realizuar ekstradimi nga Kosova drejt Suedisë i një shtetasi kosovar, i kërkuar nga autoritetet suedeze përmes INTERPOL-it, nën dyshimin për kryerjen e veprës penale “Dhunim”.
“Drejtoria për Bashkëpunim Ndërkombëtar Policor, do vazhdoj me shkëmbimin e informacioneve me institucionet vendore, shtetet dhe organizatat ndërkombëtare me qëllim të parandalimit, hetimit dhe zbulimit të aktiviteteve kriminale që ndërlidhen me hetimin e kryesve të veprave penale, si dhe aktivitete tjera në gjurmimin, kapjen-arrestimin e personave dhe grupeve kriminale që veprojnë brenda dhe jashtë vendit”, theksohet në fund të njoftimit./teve1.info/
