Edhe në këto zgjedhje, nga partitë politike në fushatë po përmendet Forca e Sigurisë së Kosovës.
Disa nga partitë si premtim kryesor e kanë përshpejtimin e anëtarësimit të Kosovës në NATO.
Por sa janë të besueshme këto premtime në kohë fushate?
Ish-oficeri i forcave ajrore thotë se deklarime të tilla nuk janë serioze për shkak se bëhen në fushatë zgjedhore.
Sipas Ismet Ibishit, Kosova tashmë është në NATO me prezencën e KFOR-it në Kosovë.
“Të gjitha forcat tona sidomos FSK-ja duhet të përmbahet nga aktivitetet mos të them paralele, do duhej të jetë e sinkronizuar dhe në bashkëpunim të ngushtë me KFOR-in. Politikën e ksiha sugjeru që sidomos në këtë fushatë sa më larg duart nga institucionet e sigurisë, ajo që është FSK-ja dhe Policia e Kosovës që po e bën një punë të shkëlqyeshme”, thotë Ismet Ibishi, ish-ushtarak.
E nënkoloneli në pension i Policisë, Refki Morina thotë se ushtria e vendit gradualisht po përmbush kriteret për anëtarësim në Aleancën Veriatlantike.
Por që thekson se kjo varet edhe nga rrethanat politike.
“Edhe ushtria jonë profesionalizmi i ushtrisë sonë i nevojitet NATO-s por edhe NATO është pjesë e jona pasi që është në territorin e Republikës së Kosovës… Rrethanat politike, strategjike dhe ushtarake në tërësi janë faktorët dominues që ndikojnë që ushtria jonë të jetë pjesë e NATO-s dhe njëherit të jetë pjesë e trupave të NATO-s jo vetëm në Kosovë por edhe pjesët tjera ku ka si qëllim të vetëm NATO ta ruajë sigurinë dhe paqen në botë”, thotë Morina.
Tëvë1 ka kërkuar një qëndrim edhe nga Ministria e Mbrojtjes për të parë se cilat kritere janë përmbushur dhe synimet e vitit 2025, mirëpo nuk ka pasur përgjigje.
Buxheti për fushën e mbrojtjes për vitin 2025 ka pësuar rritje prej 36 për qind dhe kap shifrën prej 208 milionë eurosh.
