Ministria e Mbrojtjes së Kosovës ka nënshkruar një kontratë trevjeçare me kompaninë ndërkombëtare AM General për blerjen e sistemeve artilerike HUMVEE Hawkeye 105 mm, të cilat mundësojnë integrimin e një topi 105 mm me platformën HUMVEE.
Këto sisteme lejojnë që njësi artilerie të vendosen, të hapin zjarr dhe të zhvendosen në më pak se 90 sekonda, duke rritur ndjeshëm mbijetesën ndaj zjarrit kundërshtues krahasuar me sistemet tradicionale tërheqëse.
Përveç sistemeve Hawkeye, Forca e Sigurisë së Kosovës do të pajiset edhe me ambulanca ushtarake, automjete komanduese dhe kontrolli, si dhe kamionë të tjerë mbështetës, duke mundësuar funksionimin e një baterie të plotë artilerie dhe ngritjen e kapaciteteve të zjarrit indirekt.
Dorëzimet pritet të fillojnë brenda dy viteve të ardhshme.
Kontrata u nënshkrua sot nga John Chadbourne, Zëvendës President Ekzekutiv për Zhvillim Biznesi i AM General, dhe ministri në detyrë i Mbrojtjes, Ejup Maqedonci.
Lajmin për Tëvë1 e ka konfirmuar zëdhënësja në Ministrinë e Mbrojtjes, Liridona Gashi.
“Konfirmojmë që Ministria e Mbrojtjes ka nënshkruar kontratën për blerjen e Sistemit Mobile Howitzer, HUMVEE Howkeye 105mm”, ka thënë Gashi./teve1.info/
