Një ekip i televizionit T7 ka raportuar se ditën e djeshme janë kanosur në Leposaviq gjatë kryerjes së punës së tyre.
Sipas asaj që i kanë thënë policisë, ata janë përcjellur nga dy persona që kanë qenë në një veturë në lëvizje. Madje në një moment dyshohet se njëri prej atyre personave ua ka drejtuar armën dhe i ka bërë me shenjë që të ndalen.
Në njoftim bëhet e ditur se ekipi ka vazhduar deri te një njësi policore e cila ishte në detyrë në pikë kontrolli tek ura e Bistricës.
“Viktima mashkull kosovar gazetar i TV-7, ka raportuar se derisa ka qenë me dëshmitarin mashkull kosovar, dy persona të panjohur me një veturë në lëvizje u janë vënë mbrapa dhe gjatë ndjekjes dyshohet se njëri nga të dyshuarit ua kishte drejtuar armën dhe duke i bërë me shenjë që të ndalen. Ekipi i gazetarëve kishte vazhduar deri te një njësi policore e cila ishte në detyrë në pikë kontrolli tek ura e Bistricës. Lidhur me rastin janë duke u kryer hetime nga njësitet policore”, thuhet në një njoftim.
Këtë rast e ka dënuar dje Asociacioni i Gazetarë të Kosovës.
AGK-ja ka alarmuar për pasigurinë e me të cilën ballafaqohen ekipet e gazetarëve që shkojnë për të raportuar në veri, teksa u ka kërkuar organeve që të shtojnë përpjekjet e tyre për të ofruar sigurinë e nevojshme që gazetarët ta kryejnë punën e tyre të parrezikuar.
