Analistja politike Pranvera Ejupi ka komentuar zhvillimet e fundit politike dhe dakordimin e Lidhja Demokratike e Kosovës për të garuar së bashku me Vjosa Osmani në zgjedhjet e ardhshme.
Në emisionin “Këndi i debatit” në Tëvë1, ajo ka vlerësuar se ky hap vjen pas një rezultati të dobët të LDK-së në zgjedhjet e fundit, duke theksuar se kryetari i partisë, Lumir Abdixhiku, po përpiqet të rikthejë fuqinë e subjektit.
“Kur e shohim rezultatin e 28 dhjetorit, LDK-ja ka dalë e dobët dhe kjo i është faturuar Lumir Abdixhikut. Ka pasur kritika të shumta se si erdhi ky rezultat. Abdixhiku po shikon të gjitha mënyrat për ta shpëtuar LDK-në, sepse ajo ka ardhur buzë rrënimit për arsye të brendshme. Vjosa Osmani është shansi i fundit që LDK të ngritet dhe unë mendoj që do të ketë rritje me listën me të cilën ajo do të garojë,” ka deklaruar Ejupi.
Ajo ka kritikuar gjithashtu lëvizjet politike të individëve nga një parti në tjetrën, duke i cilësuar si mungesë besnikërie politike.
“Nuk më pëlqen që ata që e tradhtojnë një parti, pastaj kalojnë te një tjetër. Nuk është besnikëri politike që herë të jesh në një parti e herë në një tjetër,” është shprehur ajo.
Ejupi ka komentuar edhe ndikimin që mund të ketë kjo lëvizje në rezultatin e Lëvizja Vetëvendosje, duke parashikuar rënie të mbështetjes për këtë subjekt.
“Me kalimin e Vjosa Osmanit në LDK, unë mendoj se Vetëvendosje do të ketë rënie të dukshme të rezultatit. Mund të kthehet te niveli i zgjedhjeve të kaluara, rreth 42 për qind,” ka përfunduar Ejupi.
